Nyumput Buni di nu Caang
.
Gusti Nu Agung
abdi nyumput buni
di nu caang
supaya jambatan welas asih
mapai sorangan
.
Cai di luhur mapai ka handap
neangan bumi jeung sare sakedap
Angin di handap mapai ka luhur
tara sare tara nangtung
Seneu di kulon mapai ka kidul
saha nu ilu, baturna arilu
.
Taneh kamana! Taneh ti-mana ayana?
Nonghol panca curiga nungtun sagala carita
saha jalma nu nyalira
pidoa saha anu ngalayang ka nu-Maha
Laju panca niti ngabayang dina panon
hiber jauh nuju ka awang:
Hana nguni hana mangke, tan hana nguni tan hana mangke, aya ma beuheula aya tu ayeuna, hanteu ma beuheula hanteu tu ayeuna. Hana tunggak hana watang, tan hana tunggak tan hana watang. Hana ma tunggulna aya tu catangna
.
Abdi cicing di handap tangkal
taneh saha nu siling kapendak
nuju babarengan kapamulangan?
eheh, lain hate lain akalna
Manusa poho rasana
inget hirupna
tilu sanjata nu mere hartina
nu maha kawasa ngabukakeun pantona
.
Gusti Nu Agung
akar nyumput di handap
tangkal nangtung ngajulang
manusa poho jalana
alam igel waktuna.
.
2022-2023
.
Kebon Raja
: keur Bogor
.
Aing nembe pisan dongkap
nyalira kokoreh-ngaguar nu teleum
sanajan hirup teu-hurip
sanajan dunya kalewat rupana
sanajan mangsa sakabeh sirna
Keun! Aing arek nyalira ngaguar-kokoreh
nu lengit ti bumi sangkala.
.
2023-2024
.
Wilujeung Sumping
.
Di hiji poe, Simkuring ngabayangkeun
sarebu jiwa ngawang-ngawang
sanes keur perang – sanes keur parebut
kakuasaan
atanapi keur nareangan hate Tuhan:
aya nu kekeuh naraekan ka gugunungan
turun ka sisieun lautan
cenah didinya hate Tuhan
aya nu mumujaan ka warisan karuhunan
ti pusaka jeung babatuan
cenah didinya oge hate Tuhan
aya deui nu unggal poe, bulan, taun,
ka imah-paribadahan jieunan maranehna sorangan
lewat kabudayaan – lewat kasajarahan
cenah didinya pisan hate Tuhan
.
Di hiji poe, Simkuring embung ngabayangkeun
deui sarebu jiwa nu ngawang-ngawang
nu neangan hate Tuhan
sabab bentang jeung zaman
panon poe jeung caang bulan
ceuk kuring mah eta ge hate Tuhan.
Sapun!
.
2024-2025
